El grupu “Pandereteres de Fitoria” remanez con esta formación va dos años. Hai varios años,  delles amigues de diferentes asociaciones folclóriques decidieron entamar unes clases de pandereta col folclorista Fernando de la Puente Hevia n’Uviéu. Mentanto se daben les clases dexáronlo dalgunes y axuntáronse otres, afayándose pa ensayar en Fitoria, polo que Fernando-y punxo al grupu’l nome de “Pandereteres de Fitoria”.

         El repertoriu de cantares tradicionales, recoyíos per tola xeografía asturiana, que  s’inxertaron a lo llargo d’estos años ye mui ampliu: ramos, cantares de boda, xotes, muñeires, bailles llixeros, rebudixos, xiraldilles, pasodobles.......

         Interesaes nes estremaes muestres gráfiques que vieron recoyíes poles nuestres antecesores, y nel xeitu de tocar de caúna d’elles según la so procedencia, enfotáronse n’afondar un poco más nello y empecipiaron unes clases cola panderetera Eva Tejedor Mier: toques de xota, pasodoble, muñeira...a una o a dos manes, y peculiaridaes de zones como Tinéu, Llanes, Cuideiru.......

         Va tiempu, cola formación actual, propunxéronse facer daqué distinto, sofitándose siempre nes melodíes tradicionales, cola gabita de Florentina cuadriello Sánchez, llicenciada en musicoloxía.....

         A lo llargo d’estos dos años, Panderetes de Fitoria tuvo varies actuaciones: IV festival de música tradicional Xácara, XI festival internacional L’esperteyu, taberna folk Cuévano, sidrería Tierra Astur, IV Alcuentros N’alcordanza, casa cultura de Llugones, XXVII Selmana del folklore astur (La Pola Siero), XV concursu y muestra de folklore “Ciudad de Oviedo”, Forum de la FNAC, mercáu tradicional en Llugones, nueche folk de Fitoria (a comuña con Tejedor), San Pedro en La Pola Siero, fiestes de San Xuan en Pando, fiesta de Los Humanitarios de Morea, nueche folk en Corvera, Festival Folklórico de La Guancha (Tenerife), diversos encuentros de Muyeres…....

         Al empar que los conciertos, el grupu desarrolla tamién una conferencia titulada “La muyer na música tradicional asturiana”, na que se repasen les funciones de les muyeres a lo llargo de so vida, y sobremanera los diferentes usos qu’elles facíen de les canciones: bailles, añaes, cantares de boda.......

         Anguaño’l grupu compónenlu siete persones: Guadalupe Villanueva González y Lorena Álvarez Molleda, entrambes de La Pola Siero, Yolanda Menéndez Díaz, de Granda (Siero), Verónica González Norniella, d’Uviéu, Silvia Rodríguez Vázquez y Laura Ruiz González, de Fitoria les dos, y Florentina Cuadriello Sánchez (asesora vocal y musical), que ye de Corvera.....

.. ..

Más información en www.myspace.com/pandereteresdefitoria (los nuestros cantares, semeyes, información de los próximos conciertos...). ....