FIN DI 1 CIKLU/INICIU DI 1 OTU CIKLU

Ainda és ka intendi??? Djés intendi, bu sabi, nós tudu nu sabi... nós tudu nu tem sidu testimunhas dés maravilhosu evuluçon pusitivu ciklu di rapkreoulu. Fin di 1 ciklu i iniciu di 1 otu ciklu, sim é verdadi rapkreoulu prisentimenti sta na 1 nivel nunka antis vistu. Má pa npodi splikau módi ki és ton diskutidu novu ciklu kumeça n'tem ki falau di  manu tchomadu Ghoya.
Dia 13 di Agostu, portons di prison abri más 1 bés má dés bés nau pa fitcha más 1 negru, má sim pa dexa sai kel manu principal risponsavel pa és novu ciklu ki rapAfro sa ta ultrapassa. Ghoya? Principal risponsavel? Pamódi??? Bem... repara, si nu rikua apenas 3 anus atrás (kuriosamenti tempu em ki Ghoya staba ta kumpriba pena) ruas staba cheiu di novus talentus na muvimentu, mês sin, mês nau 1 ou más mixtapes na street issu sem inklui variadissimus faixas soltus di inumerus mc's. Má gossi flan undi tudu kés ditus rappers li sta? Férias? Nau... Nton undi ki és sta? És sta tudu trankadu na studio... sin na studio, i sigundu ruas sa ta kumenta és sa ta trabadja 24 sob 24 i nu duru.
11 mês dja passa desdi ki 'Digra' divulga cé ultimu trabadju (DI OTU LADU LEI-2007/2008) má antis di Ghoya volta na fins di 2007, maioria di manus i manas sa ta kurtiba nuvidadis di rapkreoulu (nuvidadis ku 1 anu i tal i 2 anu i tal atrás di 2007). Desdi ki 'Digra' divulga cés ultimus trabadjus ki nu katem obidu nem chintidu quasi nada ou mesmu nada pur parti di kés otus mc's rapkreoulu, tudu issu enquantu ruas ainda sa ta vivi Ghoya. Góssi más du ki nunka tudu intervinientis di muvimentu rapkreoulu sa ta pára pa pensa na passadu, prisenti i futuru di nós rapkreoulu, forçandu assi pratikamenti di obriga quasi tudu mc's, prudutoris i iditoras ta trabadja u dobru ou triplu dakilu ki és staba akustumadus ta trabadja, ku más empenhu, garra, vontadi, fé, alma i amor. Ku issu tudu ta akonteci nu podi verifika 1001 factus, má kel ki ta odjadu más klaramenti é ki antis di Ghoya volta oficialmenti pa muvimentu ta parceba ser más fácil pa kés otus mc's trabadja, i gossi más dificil dipos di Ghoya volta... Iróniku!!! I actualmenti tudu issu sa ta akonteci pamódi???... Ghoya...Ghoya i Ghoya. Nu seja rialista nunka nu obi ou chinti rapkreoulu komu góssi, já sem n'sa ta fala di sons di 'Digra', má sim na kés otus mc's ki sa ta kumeça ta divulga alguns faixas apisar di 1 manera ainda 1 poku timidu dja ta da pa chinti di longi ma tabadju di kasa sa ta ser fetu. Thcéus rappers i grupus di universu rapAfro dja anuncia trabadjus pa brevi, maioria ainda pa kel anu li. É bom nu ka skeci ma otus grandis i rispetadus nomis di rapkreoulu ainda tem cés palavra pa da, má Ghoya apisar di cé ultimu trabadju ser ainda pratikamenti fresku dja é teni també cé palavra pa da, anunciandu nau 1 má sim 2 trabadjus també pa brevi, 1 dés ainda kel anu li i kelotu na iniciu di 2009, 1 trabadju a solu kelutu em grupu (Mentis Afro).
É quasi palpavel és tenson ki sta em tornu di rapkreoulu, 2008/2009 ta ser sem duvida 1 grandi embati entri midjoris mc's, produtoris i iditoras nunka antis vistu na universu rapAfro. Issu tudu pamódi nós tudu nu sta koncienti ma nés novu ciklu só kés midjoris ta manti sakedu, num épuka ki sigundu pontu di vista di maioria, midjor épuka di sempri di rapkreoulu, kel ton speradu (Geraçon D'oru) sa ta kumeça ta da 1 ar di cé graça, ainda indiskutivelmenti ku Ghoya komu nomi más sonanti di muvimentu i principal risponsavel pa iniciu dés pilon di ciklu na rapkreoulu, i assi ta kontinua ti povu dicidi u kontrario, undi povu pol, só povu podi tral, i pa issu povu mesti trabadjus ku amor, suor i sangui freskus pa (julgamentu) riabri, pior erru é skeci verdaderu essencia di rap, i koncentra na Ghoya. Góssi na recta final nka podi dexa di rifreska nhós memória, é ki Ghoya koncienti ou inkoncientimenti obriga tudu alguem trabadja nu duru, muitu más ki antis, issu sem sombra di duvidas. Cé trabadju danu más moral, sperança, força i acima di tudu danu más kredibilidadi nakilu ki nu ta fazi, na nós rap. Pamódi góssi objectivu é konsigui akompanha Ghoya ou subi riba del nés ton implakavel i maravilhosu novu ciklu di rapkreoulu ki el mesmu kumeça.

OBRIGADU [ GHOYA ]