DRD presenta'l so discu na FNAC

El sábadu 14, a les 19:30 hores, el Fórum de la FNAC acueye una actuación en directu del grupu DRD, na que se va presentar el so discu nuevu editáu por L'Aguañaz.

DRD surdió a raíz de los conciertos que se celebraron nel ciclu de Folk de Cámara en Xixón nel 2003. Depués de la salida de Diego Pangua, el grupu ta formáu por Baragaño (flauta), Rubén Bada (guitarra) y Dolfu R. Fernández (violín y voz). Fain un folk directu, sobriu y ensin subterfuxos extra. El tríu nun tien nenguna necesidá de recurrir a elementos esternos si ente ellos tres desenvuelven un discursu musical absolutamente autónomu. DRD busca, eso sí, collaboraciones puntuales, con Horacio A. García al contrabaxu en dos temes y Sergio Rodríguez (TUTU) al baxu n'otros tres, además de Burka Barganaz (gaita asturiana, percusiones) y Xosé da Silva (mandolina, violín, coros y hammond) en momentos puntuales.

El segundu discu de DRD, ensin más títulu que'l nome del grupu, tien como tema central el molín. Los temes, que nel anterior trabayu llevaben siempre nomes d'alverbios n'asturianu, nesti casu lleven los nomes de les partes del molín, y dos de los temes cantaos traten de molineros o molineres.